कम मासु र धेरै तरकारी खानुका साथै वनस्पतिमा आधारित खानपानले औसत मानिसको आयुलाई पनि उल्लेख्य रूपमा बढाउन सक्छ। लियम प्रिचेटद्वारा
नयाँ अध्ययनअनुसार रातो मासु (Red Meat) र प्रशोधित मासुको सेवन कम गरी त्यसको सट्टा तरकारी तथा गेडागुडीको सेवन बढाउँदा दीर्घरोगका घटनाहरूमा भारी कमी ल्याउन सकिन्छ।
मासुको सट्टा वनस्पतिजन्य आहार अपनाउँदा मुख्यतया तरकारीको सेवनबाट मुटुको स्वास्थ्यमा पर्ने सकारात्मक प्रभावका कारण मानिसको औसत आयुसमेत लम्बिन सक्छ।
सेप्टेम्बर महिनामा ‘द युरोपियन जर्नल अफ न्यूट्रिसन’ (The European Journal of Nutrition) मा यो अध्ययन प्रकाशित भएको हो। अध्ययनका लेखकहरूले मानिसहरूको खानपानमा सरकारी नीतिले पार्न सक्ने प्रभावको विश्लेषण गर्न जीवन तालिका मोडल (Life table modelling) र बेलायतको सन् २०१९ को राष्ट्रिय आहार तथा पोषण सर्वेक्षण (National Diet and Nutrition Survey) को डाटा प्रयोग गरेका थिए।
बेलायतको जलवायु परिवर्तन समिति (CCC) ले मासुको सेवन ३५ देखि ५० प्रतिशतसम्म घटाउनुपर्ने जुन आदर्श लक्ष्य अघि सारेको छ, त्यसैको आधारमा लेखकहरूले आगामी ३० वर्षमा आहारसँग सम्बन्धित मुख्य दीर्घरोगहरूको दर र मृत्युदरको प्रक्षेपण गरेका थिए।
अध्ययनअनुसार, जलवायु परिवर्तन समितिको रातो तथा प्रशोधित मासु घटाउने लक्ष्य पूरा गर्दा ३५ प्रतिशत मासु कटौतीको परिदृश्यमा औसत आयु ७.२ महिना र ५० प्रतिशत कटौतीको परिदृश्यमा ९.४ महिनाले बढ्न सक्ने देखिएको छ।
लेखकहरूले अनुमानित आयु वृद्धिको ९५ प्रतिशत हिस्सा मुटुसम्बन्धी रोगका कारण हुने मृत्युदरमा आएको कमीसँग जोडेका छन् भने ती “मृत्युदरमा आएको सुधार” को करिब ७५ प्रतिशत हिस्सा तरकारी र गेडागुडीको बढ्दो सेवनसँग सम्बन्धित रहेको औँल्याएका छन्। यसबाहेक, अध्ययनले आन्द्राको क्यान्सर (Colorectal cancer) र टाइप २ मधुमेहका बिरामीको दर पनि घट्ने अनुमान गरेको छ।
अध्ययनका लेखकहरूले भनेका छन्, “यी अनुसन्धानमूलक अनुमानहरूले जलवायु लक्ष्यहरूसँग मेल खाने गरी नीतिगत रूपमा रातो तथा प्रशोधित मासुको सेवन घटाउँदा सार्वजनिक स्वास्थ्यमा ठूलो फाइदा पुग्न सक्छ भन्ने देखाउँछन्। यद्यपि यो मानिसको बानीमा हुने परिवर्तनमा निर्भर हुन्छ, तथापि यसका निष्कर्षहरूले मुटुसम्बन्धी रोगको भार कम गर्न र दिगो आहार तर्फको यात्रालाई अगाडि बढाउन युरोपेली रणनीतिहरूका लागि महत्त्वपूर्ण आधार प्रदान गर्छन्।”
व्यापक आहार परिवर्तनका लागि व्यावहारिक र प्रभावकारी मार्गनिर्देशनको आवश्यकता
विश्व स्वास्थ्य संगठन (WHO) का अनुसार, रातो र प्रशोधित मासुको सेवन क्यान्सर र मुटुसम्बन्धी रोगजस्ता नसर्ने रोगहरू (NCDs) को जोखिम बढाउनेसँग जोडिएको छ भन्ने बलियो प्रमाण उपलब्ध छ।
प्रोभेग इन्टरनेसनल (ProVeg International) र गोटिंगेन विश्वविद्यालय (University of Göttingen) द्वारा हालै गरिएको एक अध्ययनले अधिकांश स्वास्थ्य विज्ञहरूले राष्ट्रिय आहारसम्बन्धी निर्देशिकामा प्रमुख वनस्पतिजन्य खाद्यपदार्थहरूलाई यथेष्ट रूपमा समेट्न नसकिएको महसुस गरेको देखाएको छ। प्रोभेगले औँल्याएझैँ, व्यापक आहार परिवर्तनका लागि वैज्ञानिक रूपमा भरपर्दा, व्यावहारिक र सबैलाई समेट्ने निर्देशिकाहरू अनिवार्य छन्।
मूल लेख पढ्नका लागि यहाँ क्लिक गर्नुहोस्: Plant Based News
प्रतिक्रिया (०)